ບໍ່ຄຳ-ທອງເຊໂປນ ປອດເຊື້ອພະຍາດ COVID-19
ກັນຍາ 23, 2021
ໃນວັນທີ 21 ກັນຍາ ທີ່ຜ່ານມາ, ເຈົ້າແຂວງສະຫວັນນະເຂດ ທ່ານ ສັນຕິພາບ ພົມວິຫານ ໄດ້ລົງມາຢ້ຽມຢາມເມືອງວິລະບູລີ ເພື່ອກວດກາມາດຕະການຮັບມືກັບ ການລະບາດຂອງພະຍາດ COVID-19. ໃນການຢ້ຽມຢາມຄັ້ງນີ້, ເຈົ້າເມືອງວິລະບູລີ ທ່ານ ຄຳຜຸຍ ສີບຸນເຮືອງ ໄດ້ສະເໜີເຈດຈຳນົງໃນການລົດລະດັບຄວາມສ່ຽງຕໍ່ກັບການລະບາດຂອງພະຍາດ COVID – 19 ໃຫ້ແກ່ໂຄງການຄຳ-ທອງເຊໂປນ ຂອງບໍລິສັດ ລ້ານຊ້າງ ມິເນໂຣນສ໌ ລິມິເຕັດ ໃຫ້ພົ້ນອອກຈາກເຂດແດງ ມາເປັນເຂດເຫຼືອງ ພາຍຫຼັງທີ່ທາງພາກສະໜາມບໍ່ຄຳ-ທອງ ເຊໂປນ ບໍ່ມີການກວດພົບການຕິດເຊື້ອໃໝ່ ຜ່ານມາໄດ້ 17 ວັນຕິດຕໍ່ກັນ. ມາຮອດປັດຈຸບັນ ທຸກໆບ້ານໃນເມືອງວິລະບູລີ ໄດ້ຖືກປະກາດໃຫ້ເປັນເຂດປອດເຊື້ອພະຍາດ ເປັນບ້ານຂຽວ COVID-19 ໂດຍໄດ້ມີການຜ່ອນຜັນມາດຕະການຈຳກັດ ຈຳນວນໜຶ່ງ.
ພາຍຫຼັງທີີ່ມີການຄົ້ນພົບກໍລະນີຕິດເຊື້ອ COVID-19 ໃນພະນັກງານຂອງບໍລິສັດຮັບເໝົາຂົນສົ່ງຈຳນວນໜຶ່ງ, ໂຄງການບໍໍ່ຄຳ-ທອງເຊໂປນກໍໄດ້ ຍົກລະດັບມາດຕະການດ້ານສຸຂະອະນາໄມ, ການຈຳກັດບໍລິເວນ, ການຄົ້ນຫາຜູ້ສຳຜັດໃກ້ຊິດ ແລະ ການກວດຫາເຊື້ອ ຢ່າງຕັ້ງໜ້າ ແລະ ທັນການ ກໍຄືສອດຄ່ອງກັບ ຄຳສັ່ງການປ້ອງກັນ ແລະ ຮັບມືກັບການລະບາດທີ່ລັດຖະບານລາວໄດ້ວາງອອກ ເພື່ອໃຫ້ສາມາດລະບຸແຫຼ່ງທີ່ມາຂອງການຕິດເຊື້ອ ລວມທັງການແຍກປ່ຽວຕໍ່ກັບກໍລະນີສ່ຽງ ເພື່ອຕັດວົງຈອນການຕິດເຊື້ອ. ໃນທັນທີ ທີ່ໄດ້ກວດພົບການຕິດເຊື້ອ, ບໍລິສັດກໍ່ໄດ້ລ໋ອກດາວພາກສະໜາມເຊໂປນໂດຍຫ້າມຄົນເຂົ້າ-ອອກ ແລະ ໄດ້ເຮັດວຽກຮ່ວມມືຢ່າງໃກ້ຊິດກັບ ອຳນາດການປົກຄອງເມືອງ, ແຂວງ, ແລະ ຂັ້ນສູນກາງ ກໍຄື ບໍລິສັດຮັບເໝົາທ້ອງຖິ່ນ ເພື່ອປ້ອງກັນບໍ່ໃຫ້ມີການລະບາດເພີ່ມຕື່ມ.
ໂດຍລວມແມ່ນໄດ້ມີການລາຍງານກໍລະນີຕິດເຊື້ອຢູ່ສະໜາມເຊໂປນ 33 ຄົນ ໃນນັ້ນເປັນຜູ້ຮັບເໝົາ 25 ຄົນ ແລະ ພະນັກງານບໍລິສັດ ລຊມລ 8 ຄົນ. ທຸກໆກໍລະນີແມ່ນຕິດພັນກັບຜູ້ຮັບເໝົາຂົນສົ່ງ 25 ຄົນ ດັ່ງທີ່ໄດ້ລາຍງານໃນເບື້ອງຕົ້ນ. ບຸກຄົນທີ່ຕິດເຊື້ອແມ່ນໄດ້ເຂົ້າຮັບການປິ່ນປົວຢູ່ສູນປິ່ນປົວ ທີ່ແຂວງສະຫວັນນິະເຂດ ຕາມທີ່ພາກລັດໄດ້ກຳນົດໃຫ້ ແລະ ໄດ້ປິ່ນປົວຫາຍດີ ຢ່າງປອດໄພ. ພາຍຫຼັງສຳເລັດການປິ່ນປົວ, ທຸກໆກໍລະນີແມ່ນໄດ້ສືບຕໍ່ຈຳກັດບໍລິເວນຢູ່ສູນ ຄົບຕາມກຳນົດເວລາ ທີ່ລັດຖະບານກຳນົດໃຫ້ ແລະ ຍັງໄດ້ກັກຕົວຢູ່ເຮືອນຂອງຕົນ ຕື່ມອີກ 7 ວັນ.
ນັບຕັ້ງແຕ່ ວັນທີ 22 ສິງຫາ ທີ່ໄດ້ເລີ່ມມີການຕິດເຊື້ອ, ບໍລິສັດ ລຊມລ ກໍ່ໄດ້ດຳເນີນການກວດເຊື້ອ COVID-19 11.000 ຕົວຢ່າງ ໃຫ້ແກ່ພະນັກງານ ແລະ ຜູ້ຮັບເໝົາຂອງ ລຊມລ ທຸກໆຄົນ ຊຶ່ງໃນນັ້ນ, ນັບແຕ່ວັນທີ 05 ກັນຍາ ເປັນຕົ້ນມາ ກໍ່ບໍ່ໄດ້ກວດພົບຜູ້ຕິດເຊື້ອຕື່ມ ອີກເລີຍ.
ຍ້ອນການສະໜັບສະໜູນຂອງພະແນກສາທາລະນະສຸກແຂວງສະຫວັນນະເຂດ, ພະນັກງານ ແລະ ຜູ້ຮັບເໝົາຂອງ ລຊມລ 5,000 ຄົນ (99% ຂອງແຮງງານທັງໝົດ) ແມ່ນໄດ້ຮັບວັກຊີນຕ້ານ COVID-19. ທຸກຄົນທີ່ຈະເຂົ້າພາກສະໜາມເຊໂປນ, ຫ້ອງການຢູ່ນະຄອນຫຼວງວຽງຈັນ ແລະ ສະຫວັນນະເຂດ ແມ່ນຕ້ອງມີໃບຢັ້ງຢືນການສັກວັກຊີນ. ບໍລິສັດ ລຊມລ. ແມ່ນໄດ້ຕັ້ງໜ້າປະຕິບັດຕາມລະບຽບການຈຳກັດບໍລິເວນ ແລະ ກວດຫາເຊື້ອຂອງລັດຖະບານ ກໍຄືຄະນະສະເພາະກິດ ວາງອອກ ສະເໝີມາ.
ບໍລິສັດ ລຊມລ ມີຄວາມມຸ່ງໝັ້ນເຮັດວຽກຮ່ວມມືຢ່າງໃກ້ຊິດກັບ ລັດຖະບານ ເພື່ອຍົກລະດັບຄວາມອາດສາມາດໃນການປ້ອງກັນການແຜ່ລະບາດ COVID-19 ໂດຍໄດ້ສະໜອງເຄື່ອງມືກວດເຊື້ອ COVID-19 ແບບໄວ ພ້ອມທັງສະໜັບສະໜູນອຸປະກອນ, ທຶນຮອນຈຳນວນນຶ່ງ ໃຫ້ແກ່ເມືອງວິລະບູລີ ໃນການກະກຽມໂຮງໝໍພາກສະໜາມ ພ້ອມທັງໄດ້ໃຫ້ການສະໜັບສະໜູນໃຫ້ແກ່ແຂວງສະຫວັນນະເຂດ ໃນການຍົກລະດັບສູນຈຳກັດບໍລິເວນ ແລະ ເຄື່ອງກວດເຊື້ອແບບ PCR ເຂົ້າໃນວຽກງານຂອງແຂວງ ເພື່ອປົກປ້ອງປະຊາກອນ ໃຫ້ສາມາດຫຼີກເວັ້ນຈາກການລະບາດຂອງພະຍາດ COVID-19. ມາຮອດປັດຈຸບັນ, ບໍລິສັດ ລຊມລ ໄດ້ປະກອບສ່ວນສະໜັບສະໜູນ ໃຫ້ແກ່ລັດຖະບານາວໃນການປ້ອງກັນ ແລະ ແກ້ໄຂການລະບາດພະຍາດ COVID-19 ຄິດເປັນຈຳນວນທັງໝົດ 450.000 ໂດລາ ສະຫະລັດ.
ໃນດ້ານເສດຖະກິດສັງຄົມ, ນັບຕັ້ງແຕ່ໄດ້ເລີ່ມດຳເນີນງານ ໃນປີ 2003, ບໍລິສັດ ລຊມລ ໄດ້ປະກອບສ່ວນ US$1.5 ຕື້ ເພື່ອເປັນລາຍຮັບໂດຍກົງໃຫ້ແກ່ລັດຖະບານ ບວກກັບ ຫຼາຍຮ້ອຍລ້ານໂດລາສະຫະລັດ ທີ່ເປັນຜົນປະໂຫຍດທາງອ້ອມ ໂດຍຜ່ານການພັດທະນາຊຸມຊົນ, ການສ້າງວຽກເຮັດງານທຳ, ການຝຶກອົບຮົມ ແລະ ການພັດທະນາສີມືແຮງງານ ກໍຄື ສະໜັບສະໜູນຫົວໜ່ວຍທຸລະກິດທ້ອງຖິ່ນ ຢູ່ແຂວງສະຫວັນນະເຂດ ແລະ ສປປ ລາວ.
