ທ່ານ ຫວາງ ຈ້ຽນຫົວ, ປະທານບໍລິສັດ ຊືເຟິງ ຈີຫຼົງຂຸດຄົ້ນຄຳ ຢ້ຽມຄຳນັບພະນະທ່ານ ສົມມາດ ພົນເສນາ, ຮອງປະທານສະພາແຫ່ງຊາດ ແລະ ທ່ານ ທອງພັດ ອິນທະວົງ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່
ສິງຫາ 05, 2021
ໃນວັນທີ 4 ສິງຫາ 2021 ປະທານບໍລິສັດ ຊືເຟິງ ຈີຫຼົງຂຸດຄົ້ນຄຳ ໄດ້ຢ້ຽມຄຳນັບທ່ານ ສົມມາດ ພົນເສນາ – ຮອງປະທານສະພາແຫ່ງຊາດ ແລະ ທ່ານ ທອງພັດ ອິນທະວົງ – ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ເນືຶ່ອງໃນໂອກາດທີ່ທ່ານ ມາຢ້ຽມຢາມ ສປປ ລາວ ເຊິ່ງເປັນ ຄັ້ງທີສອງ ຕັ້ງແຕ່ ບໍລິສັດ ຊືເຟິງ ໄດ້ກ້າວມາເປັນຜູ່ຖືຮຸ້ນສ່ວນໃຫຍ່ໃນບໍລິສັດ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ບໍ່ຄຳ–ທອງເຊໂປນ ນັບແຕ່ປີ 2018 ເປັນຕົ້ນມາ. ທ່ານ ຫວາງ ໄດ້ລາຍງານຄວາມຄືບໜ້າຂອງໂຄງການຄຳ–ທອງ ເຊໂປນ ພ້ອມທັ້ງຢັ້ງຢືນແຜນການຂະຫຍາຍກິດຈະການດັ່ງກ່າວໃນ ສປປ ລາວ.
ທ່ານ ຫວາງ ໄດ້ສະແດງຄວາມຂອບໃຈຕໍ່ລັດຖະບານລາວ ທີ່ໄດ້ໃຫ້ການສະໜັບສະໜູນແກ່ ລຊມລ ແລະ ບໍ່ຄຳ-ທອງ ເຊໂປນ ສະເໝີມາ.
ບໍລິສັດ ຊືເຟິງ ລ້ານຊ້າງ ມີເນໂຣນສ ລິມິເຕັດ ໄດ້ກັບຄືນມາຜະລິດຄຳ ໃນປີ 2020 ແລະ ຍືດອາຍຸບໍ່ຄຳ-ທອງ ເຊໂປນ ອອກໄປອີກ ເຮັດໃຫ້ສາມາດສືບຕໍ່ສ້າງຜົນປະໂຫຍດດ້ານເສດຖະກິດໃຫ້ແກ່ ສປປ ລາວ.
ທ່ານ ຫວາງ ຈ້ຽນຫົວ, ປະທານ ບໍລິສັດ ຊືເຟິງ ຈີຫຼົງຂຸດຄົ້ນຄຳ ໄດ້ກ່າວວ່າ “ຄວາມປອດໄພ ແລະ ການປົກປັກຮັກສາສິ່ງແວດລ້ອມ ເປັນບຸລິມະສິດສຳຄັນທີ່ສຸດໃນຂະແໜງການບໍ່ແຮ່.”
ລຊມລ ເປັນວິສາຫະກິດແບບຢ່າງໃນ ສປປ ລາວ ທີ່ໄດ້ຮັບກຽດຕິສັກໃນລະດັບດີເລີດໃນຂັ້ນ (A+) ຈາກກະຊວງພະລັງງານ ແລະ ບໍ່ແຮ່ ໃນດ້ານການປະຕິບັດໄດ້ ດຳເນີນການຂຸດຄົ້ນບໍ່ແຮ່ ຕາມມາດຕະຖານສາກົນ ລວມທັງການປົກປັກຮັກສາສິ່ງແວດລ້ອມ, ການພັດທະນາຊຸມຊົນແບບມີສ່ວນຮ່ວມ ແລະ ການປະຕິບັດມາດຕະຖານ ທາງດ້ານຄວາມປອດໄພ ໃນການເຮັດວຽກຂອງໂຄງການ.
ທ່ານ ຫວາງ ຍັງໄດ້ກ່າວຕື່ມອີກວ່າ: “ຂ້າພະເຈົ້າມີຄວາມພາກພູມໃຈ ທີ່ໄດ້ເຫັນຄວາມຄືບໜ້າຂອງໂຄງການຂຸດຄົ້ນບໍ່ຄຳ-ທອງ ເຊໂປນ ທີ່ສາມາດສືບຕໍ່ດຳເນີນໄປໃນຊ່ວງໄລຍະທີ່ມີຄວາມທ້າທາຍຈາກການລະບາດຂອງພະຍາດ COVID-19. ບໍລິສັດ ຊືເຟິງ ຂໍຢັ້ງຢືນຄວາມໝາຍໝັ້ນໃນການຮ່ວມມືຢ່າງໃກ້ຊິດ ກັບ ລັດຖະບານລາວ ເພື່ອສະໜັບສະໜູນການສ້າງວຽກເຮັດງານທຳ ແລະ ການພັດທະນາເສດຖະກິດໃນ ສປປ ລາວ ກໍຄື ການຜ່ານຜ່າການລະບາດໂຄວິດນີ້ໄປນຳກັນ.”
ທ່ານ ສົມມາດ ພົນເສນາ, ຮອງປະທານ ສະພາແຫ່ງຊາດ ກໍໄດ້ໄດ້ຍ້ອງຍໍບໍລິສັດ ຊືເຟິງ ແລະ ລຊມລ ສຳລັບການສະໜັບສະໜູນໃຫ້ແກ່ພາກລັດ ໃນໄລຍະການລະບາດຂອງພະຍາດ COVID-19. ຕັ້ງແຕ່ເລີ່ມມີການລະບາດຂອງພະຍາດໂຄວິດໃນ ສປປ ລາວ, ລຊມລ ໄດ້ປະກອບສ່ວນເປັນທຶນຮອນຫຼາຍກວ່າ US$370.000 ໃຫ້ແກ່ລັດຖະບານລາວ ເພື່ອຈັດຊື້ວັກຊີນ, ສະໜັບສະໜູນວຽກງານວິເຄາະ-ກວດຫາເຊື້ອ, ກັກບໍລິເວນ, ແພດໝໍ, ໜ່ວຍກູ້ໄພ ແລະ ວຽກງານຮັບມືສຸກເສີນອື່ນໆ.
