LXML ເນັ້ນໜັກການສະໜັບສະໜູນ ການລົງທຶນທີ່ມີຄຸນນະພາບໃນຂະແໜງບໍ່ແຮ່ ຕໍ່ ກອງປະຊຸມພົບປະລະຫວ່າງລັດຖະບານ ແລະ ພາກທຸລະກິດ
ທັນວາ 21, 2021
ໃນອາທິດຜ່ານມາ, ທ່ານສະໝານ ອະເນກາ, ຜູ້ອຳນວຍການໃຫຍ່ LXML ແລະ ທັງເປັນ ຮອງປະທານກິຕິມະສັກສະພາທີ່ປຶກສາຂອງ ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ເຂົ້າຮ່ວມ ກອງປະຊຸມພົບປະລະຫວ່າງລັດຖະບານ ແລະ ພາກທຸລະກິດ ໂດຍການໃຫ້ກຽດເປັນປະທານຂອງ ພະນະທ່ານ ພັນຄຳ ວິພາວັນ, ນາຍົກລັດຖະມົນຕີແຫ່ງ ສປປ ລາວ.
ໂດຍການເຂົ້າຮ່ວມຂອງ ຮອງນາຍົກລັດຖະມົນຕີ, ລັດຖະມົນຕີ, ພາກທຸລະກິດ ແລະ ຜູ້ຕາງໜ້າພັກ ແລະ ອົງການຂອງລັດ, ຈຸດປະສົງຂອງກອງປະຊຸມດັ່ງກ່າວທີ່ຈັດຂຶ້ນສອງວັນນັ້ນ ແມ່ນເພື່ອຍົກສູງການຮ່ວມມືລະຫວ່າງພາກລັດ ແລະ ເອກະຊົນໃນການຜ່ານຜ່າຄວາມທ້າທາຍທີ່ພວມປະເຊີນຈາກ ວິກິດການ COVID-19 ກໍຄື ການຟື້ນຟູ ຂອງປະເທດ.
ທ່ານ ນາຍົກລັດຖະມົນຕີ ພັນຄຳ ວິພາວັນ ໄດ້ກ່າວວ່າ: “ພາກລັດ ແລະ ພາກທຸລະກິດ ບໍ່ສາມາດດຳເນີນງານແບບເອກະລາດໃຜລາວ. ພາກລັດ ແລະ ພາກທຸລະກິດ ເປັນຮຸ້ນສ່ວນທີ່ສຳຄັນຮ່ວມກັນໃນການພັດທະນາປະເທດຊາດ ໃຫ້ຫລຸດພົ້ນອອກຈາກຄວາມທຸກຍາກ.”[1]
ຜູ້ເຂົ້າຮ່ວມໄດ້ປຶກສາຫາລື ກ່ຽວກັບ ການປັບປຸງການບໍລິການລົງທຶນປະຕູດຽວ, ການຊຸກຍູ້ສົ່ງເສີມການຜະລິດກະສິກຳເປັນສິນຄ້າ, ການສ້າງຄວາມເຂັ້ມແຂງໃຫ້ແກ່ອຸດສາຫະກຳປຸງແຕ່ງສຳລັບຕະຫຼາດພາຍໃນ ແລະ ສົ່ງອອກ, ການສົ່ງເສີມຂະແໜງບໍລິການ, ການກຳນົດຂອບເຂດທີ່ດິນຕາມທາງລົດໄຟລາວ-ຈີນເພື່ອກຳນົດເປັນເຂດຜະລິດກະສິກຳ, ອຸດສາຫະກຳ ແລະ ການບໍລິການ, ການພັດທະນາສີມືແຮງງານ ແລະ ການສ້າງວຽກເຮັດງານທຳ.
ຈາກທັດສະນະ/ໃນນາມສະພາທີ່ປຶກສາຂອງ LNCCI ແລະ LXML (ບໍລິສັດບໍ່ແຮ່ທີ່ໃຫຍ່ທີ່ສຸດໃນ ສປປ ລາວ), ແລະ ຈາກປະສົບການ 30 ປີ ໃນຂະແໜງການບໍ່ແຮ່ ທ່ານ ສະໝານ ອະເນກາ ໄດ້ສະເໜີຄຳເຫັນແລກປ່ຽນຕໍ່ກອງປະຊຸມ ເພື່ອດຶງດູດນັກລົງທຶນທີ່ດີ ແລະ ສົ່ງເສີມທຸລະກິດບໍ່ແຮ່ທີ່ມີຄວາມຮັບຜິດຊອບສູງ ພ້ອມທັງໄປຄວບຄູ່ກັນກັບການປະເມີນສະພາບແວດລ້ອມເສດຖະກິດໃນປັດຈຸບັນ. ທ່ານໄດ້ເນັ້ນໜັກວ່າ ທຸລະກິດບໍ່ແຮ່ຢູ່ໃນ ສປປ ລາວ ຄວນປະຕິບັດການຄຸ້ມຄອງດ້ວຍກົດໝາຍຢ່າງເຄັ່ງຄັດ ໂດຍບໍ່ໃຫ້ມີການລັດຂັ້ນຕອນໃນການອະນຸມັດ ເພາະຈະເປັນຊ່ອງຫວ່າງໃຫ້ຜູ່ລົງທຶນ ທີ່ບໍ່ຮູ້ເທົ້າເຖິງການ ຟ້າວກະໂດດໄປລົງທຶນດ້ວຍຕົ້ນທຶນສູງເກີນກວ່າຄວາມເປັນຈິງ ແລ້ວ ອາດຫລຸບທຶນ ແລ້ວ ໜີໄປ ເຊິ່ງຈະກະທົບເປັນຕ່ອງໂສ້ ໃຫ້ທະນາຄານມີໜີ້ເສຽ ແລະ ກາຍເປັນການລົ້ມລະລາຍແບບແຝງລອຍຕໍ່ເນື່ອງ. ສຸດທ້າຍ, ລັດຖະບານກໍຈະບໍ່ໄດ້ລາຍຮັບ ແຖມຍັງຕ້ອງໄດ້ລົງທຶນໃນການຟື້ນຟູສິ່ງແວດລ້ອມ ແລະ ການປິດບໍ່ແຮ່ ດ້ວຍລັດຖະບານເອງ. ນອກຈາກນັ້ນ, ນັກລົງທຶນກໍ ຄວນປະຕິບັດຕາມມາດຕະຖານດ້ານສິ່ງແວດລ້ອມ ແລະ ສັງຄົມ ເພື່ອຜົນປະໂຫຍດຂອງສັງຄົມ ກໍຄືເພື່ອ ຊຸກຍູ້ການຟື້ນຟູຂອງເສດຖະກິດ.
ທ່ານ ສະໝານ ອະເນກາ ກ່າວວ່າ: “ສປປ ລາວ ຕ້ອງການ ການລົງທຶນທີ່ມີຄວາມໂປ່ງໄສ ແລະ ຂອບລະບົບນິຕິກຳທີ່ເຂັ້ມແຂງ ເພື່ອດຶງດູດ ແລະ ຮັກສາ ນັກລົງທຶນທີ່ມີຄວາມຮັບຜິດຊອບ ແລະ ຄຸນນະພາບ ໃນຂະແໜງບໍ່ແຮ່ ກໍຄືຂະແໜງການອື່ນໆ. ອັນນີ້ ຈະຊ່ວຍສ້າງວຽກເຮັດງານທຳ, ລາຍຮັບ ແລະ ຜົນປະໂຫຍດອື່ນໆເພື່ອສະໜັບສະໜູນ ລັດຖະບານລາວ ແລະ ຊຸມຊົນໃນການຟື້ນຟູຈາກ ຜົນກະທົບຂອງການລະບາດພະຍາດ COVID-19 ແລະ ການ ຫລຸດພົ້ນຈາກຄວາມທຸກຍາກຂອງສັງຄົມ ຜ່ານການພັດທະນາທີ່ຍືນຍົງ.”
ຕັ້ງແຕ່ເລີ່ມມີການລະບາດຂອງພະຍາດ COVID-19, LXML ໄດ້ສະໜອງປະມານ US$500.000 ໃຫ້ແກ່ລັດຖະບານລາວເພື່ອສະໜັບສະໜູນວຽກງານການຮັບມືກັບເຫດສຸກເສີນ ຢູ່ໃນ ສປປ ລາວ. 99% ຂອງພະນັກງານ ແລະ ຜູ້ຮັບເໝົາ 5000 ຄົນຂອງບໍລິສັດແມ່ນໄດ້ຮັບວັກຊີນປ້ອງກັນ COVID-19 ແລະ ຍັງສືບຕໍ່ປະຕິບັດຕາມມາກຕະການປ້ອງກັນຢ່າງເຂັ້ມງວດ.
ຕັ້ງແຕ່ເລີ່ມດຳເນີນການຂຸດຄົ້ນ-ຜະລິດຄຳ-ທອງໃນປີ 2002, LXML ໄດ້ປະກອບສ່ວນເປັນລາຍຮັບໂດຍກົງໃຫ້ແກ່ ລັດຖະບານລາວ US$1.6 ຕື້ ຜ່ານການຈ່າຍພາສີ-ອາກອນ, ຄ່າຊັບພະຍາກອນແຮ່ທາດ ແລະ ເງິນປັນຜົນ. ນອກຈາກນັ້ນ ຍັງໄດ້ລົງທຶນກວ່າ US$50 ລ້ານ ເຂົ້າໃສ່ການພັດທະນາພື້ນຖານໂຄງລ່າງ ແລະ ການອະນຸລັກມໍລະດົກທາງວັດທະນະທຳ, US$52 ລ້ານ ໃນວຽກງານເກັບກູ້ລະເບີດບໍ່ທັນແຕກ ແລະ ຜົນປະໂຫຍດທາງອ້ອມ ຫຼາຍຮ້ອຍລ້ານໂດລາສະຫະລັດ ຜ່ານການສ້າງວຽກເຮັດງານທຳ, ການພັດທະນາສີມືແຮງງານ, ການພັດທະນາຊຸມຊົນ ແລະ ແຜນງານສະໜັບສະໜູນອື່ນໆ.
ສະມາຊິກຊຸມຊົນຢູ່ເມືອງວິລະບູລີ 40.000 ຄົນ, ເຊິ່ງເປັນທີ່ຕັ້ງຂອງບໍ່ຄຳ-ທອງເຊໂປນ, ແມ່ນໄດ້ຮັບຜົນປະໂຫຍດປະມານ US$20 ລ້ານ ຈາກແຜນງານພັດທະນາຊຸມຊົນ. ລາຍໄດ້ຂອງຊຸມຊົນ ຜ່ານ ກຸ່ມທຸລະກິດທ້ອງຖິ່ນ ແມ່ນໄດ້ທະວີຄູນເຖິງ US$46 ລ້ານ.
LXML ໝາຍໝັ້ນຢ່າງໜັກແໜ້ນ ເປັນຕົ້ນແບບດ້ານການຂຸດຄົ້ນບໍ່ແຮ່ ແລະ ຮ່ວມມືກັບລັດຖະບານລາວເພື່ອຮັບປະກັນຄວາມສຳເລັດຢ່າງຕໍ່ເນື່ອງຂອງ ໂຄງການຄຳ-ທອງ ເຊໂປນ ເພື່ອຜົນປະໂຫຍດຂອງຜູ້ມີສ່ວນຮ່ວມທຸກພາກສ່ວນ.
[1] Vientiane Times, 20 ທັນວາ 2021, ພາລັກ ແລະ ເອກະຊົນຕ້ອງເຮັດວຽກຮ່ວມກັນເພື່ອຜ່ານຜ່າຄວາມທ້າທາຍ: ນຍ
