ບໍລິສັດ ລ້ານຊ້າງ ມີເນໂຣນສ໌ ລິມິເຕັດ (ລຊມລ) ຮັກສາການຜະລິດທີ່ເຂັ້ມແຂງໃນເຄິ່ງຕົ້ນປີ 2022
ສິງຫາ 09, 2022
ໃນເຄິ່ງຕົ້ນປີ 2022 ມາຮອດທີ 30 ມິຖຸນາ, ບໍ່ຄຳ-ທອງເຊໂປນ ສາມາດຜະລິດ ຄຳໄດ້ 102,468 ອອນສ໌ (2.9 ໂຕນ) ແລະ ແຜ່ນທອງສຳເລັດຮູບໄດ້ 3,933 ໂຕນ, ເພີ່ມຂຶ້ນ 15 ສ່ວນຮ້ອຍ ທຽບໃສ່ໄລຍະດຽວກັນຂອງປີກາຍ.
ໃນປີ 2021, ບໍ່ຄຳ-ທອງເຊໂປນ ສາມາດຜະລິດຄຳ 192,988 ອອນສ໌ (6 ໂຕນ), ແລະ ທອງໄດ້ 5,341 ໂຕນ.
ໃນປີ 2021, ບໍລິສັດ ລຊມລ ປະກອບສ່ວນເປັນລາຍຮັບໂດຍກົງໃຫ້ແກ່ລັດຖະບານ ສປປ ລາວ ຈຳນວນ US$40,843,028.09 ຈາກການຈ່າຍພາສີຊັບພະຍາກອນແຮ່ທາດ, ອາກອນຕ່າງໆ ແລະ ເງິນປັນຜົນ.
ນັບຕັ້ງແຕ່ເລີ່ມການຜະລິດໃນປີ 2003, ບໍ່ຄຳ-ທອງເຊໂປນ ປະກອບສ່ວນເປັນລາຍຮັບໂດຍກົງໃຫ້ແກ່ລັດຖະບານລາວກວ່າ US$1.6 ຕື້ ຈາກການຈ່າຍອາກອນຕ່າງໆ, ພາສີຊັບພະຍາກອນທຳມະຊາດ ແລະ ເງິນປັນຜົນ, ນອກຈາກນັ້ນຍັງປະກອບສ່ວນຫຼາຍຮ້ອຍລ້ານໂດລາສະຫະລັດ ຈາກການສ້າງວຽກເຮັດງານທຳ, ການຝຶກອົບຮົມ, ການພັດທະນາຊຸມຊົນ ແລະ ທຸລະກິດທ້ອງຖິ່ນ. ບໍ່ຄຳ-ທອງເຊໂປນ ສ້າງວຽກເຮັດງານທຳໃຫ້ແກ່ຄົນທ້ອງຖິ່ນຫຼາຍກວ່າ 5000 ຄົນ.
ທ່ານ ຫວາງ ຈ້ຽນຫົວ ປະທານບໍລິສັດ ຊືເຟິງ ຂຸດຄົ້ນຄຳ ກ່າວໃນເວລາຢ້ຽມຢາມ ສປປ ລາວ ໃນກາງເດືອນກໍລະກົດ ເພື່ອນຳສະເໜີແຜນຂະຫຍາຍຕົວຂອງບໍລິສັດ ວ່າ: “ຂ້າພະເຈົ້າ ມີຄວາມພາກພູມໃຈຕໍ່ການປະກອບສ່ວນອັນດີເລີດນີ້ ຂອງ ພະນັກງານ ລຊມລ ທັງໝົດ ໃນການບັນລຸເປົ້າໝາຍການຜະລິດ. ບໍລິສັດຊືເຟິງ ລຊມລ ມີຄວາມພາກພູມໃຈໃນການເປັນຄູ່ຮ່ວມພັດທະນາໃນ ສປປ ລາວ.”
ໃນເວລາທີ່ພົບປະຢ່າງອົບອຸ່ນກັບ ພະນະທ່ານ ປອ ໄຊສົມພອນ ພົມວິຫານ ປະທານສະພາແຫ່ງຊາດ, ພະນະທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານນາງ ບຸນຄຳ ວໍລະຈິດ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ບຸນໂຈມ ອຸບົນປະເສີດ ລັດຖະມົນຕີ ກະຊວງການເງິນ, ທ່ານ ປອ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະ ບໍ່ແຮ່, ແລະ ທ່ານ ສັນຕິພາບ ພົມວິຫານ ເຈົ້າແຂວງໆ ສະຫວັນນະເຂດ, ທ່ານ ຫວາງ ຈ້ຽນຫົວ ໄດ້ຢັ້ງຢືນຄວາມມຸ່ງໝັ້ນຂອງບໍລິ ສັດ ຊືເຟິງ ໃນການເພີ່ມທະວີການພົວພັນ ແລະ ລົງທຶນ ໃນສປປ ລາວ ເພື່ອພັດທະນາໂຄງການຄຳ, ທອງ ແລະ ແຮ່ຫາຍາກ,
ທ່ານກ່າວຕື່ມອີກວ່າ: “ທຸກອົງກອນສະແຫວງຫາການພັດທະນາໄລຍະຍາວ ແລະ ສິ່ງນີ້ ຈະເປັນຜົນສຳເລັດທີ່ດີທີ່ສຸດ ຈາກການຮ່ວມມືກັບອຳນາດການປົກຄອງທ້ອງຖິ່ນ ແລະ ທີມງານທີ່ເຂັ້ມແຂງ ທີ່ມີເປົ້າໝາຍອັນດຽວກັນ. ການລົງທຶນໃນໂຄງການໃໝ່ຈະສ້າງຜົນປະໂຫຍດໃຫ້ແກ່ປະຊາຊົນ ລັດຖະບານລາວ. ຂ້າພະເຈົ້າມີຄວາມພາກພູມໃຈຕໍ່ຜົນສຳເລັດຂອງ ລຊມລ ໃນການສ້າງວຽກເຮັດງານທຳ, ຝຶກອົບຮົມ, ພັດທະນາຊຸມຊົນ ແລະ ປະກອບສ່ວນສ້າງລາຍຮັບໃຫ້ແກ່ລັດຖະບານລາວ.”
ປະຈຸບັນນີ້, ບໍລິສັດ ຊືເຟິງ ຈີຫຼົງຂຸດຄົ້ນຄຳ ໄດ້ຖືຫຸ້ນ 90 ສ່ວນຮ້ອຍໃນ ບໍລິສັດ ລ້ານຊ້າງ ມິເນໂຣນສ໌ ລິມິເຕັດ ເຊິ່ງເປັນເຈົ້າຂອງ ແລະ ດຳເນີນໂຄງການຄຳ-ທອງ ເຊໂປນ ຢູ່ ແຂວງສະຫວັນນະເຂດ.
ໃນເດືອນກໍລະກົດ 2022, ບໍລິສັດ ຊືເຟິງ ຂຸດຄົ້ນຄຳ ໄດ້ເຊັນສັນຍາຮ່ວມມືຄັ້ງປະຫວັດສາດ ກັບ ລັດວິສະຫະກິດພັດທະນາແຮ່ທາດລາວ ໃນການສຳຫຼວດ ແລະ ພັດທະນາຊັບພະຍາກອນແຮ່ທາດເພີ່ມຕື່ມ ເພື່ອພັດທະນາການຜະລິດຂະໜາດໃຫຍ່ໃນອະນາຄົດ ຢູ່ໃນສປປ ລາວ.
ທ່ານ ພໍ ແຮຣິສ, ຜູ້ຈັດການໃຫຍ່ ບໍ່ຄຳ-ທອງເຊໂປນກ່າວວ່າ: ສັນຍາສະບັບນີ້ ຍົກໃຫ້ເຫັນຄວາມໝາຍໝັ້ນທີ່ມີມາຍາວນານຂອງບໍລິສັດ ການພັດທະນາຂະແໜງການບໍ່ແຮ່ ຢູ່ໃນ ສປປ ລາວ.”
ໃນເດືອນເມສາ 2022, ລຊມລ ປະກອບສ່ວນ US$5 ໃຫ້ແກ່ແຂວງສະຫວັນນະເຂດ ໃນການຍົກລະດັບເສັ້ນທາງຂອງລັດ ເລກ 28A, ຊຶ່ງເປັນເສັ້ນທາງຂົນສົ່ງທີ່ສຳຄັນໃນການຂະຫຍາຍການເຊື່ອມໂຍງຕາເວັນອອກ-ຕາເວັນຕົກ ຂອງ ສປປ ລາວ, ໄທ ແລະ ຫວຽດນາມ. ການລົງທຶນຄັ້ງນີ້ຈະຊ່ວຍເພີ່ມໂອກາດສຳລັບການຄ້າ ແລະ ການທ່ອງທ່ຽວໃນຂົງເຂດດັ່ງກ່າວ.
ໃນເດືອນພຶດສະພາ 2022, ບໍລິສັດ ລຊມລ ເລີ່ມການກໍ່ສ້າງອຸງມົງບໍ່ແຮ່ໃຕ້ດິນທີ່ທັນສະໄໝແຫ່ງທຳອິດຂອງ ສປປລາວ. ຄາດຄະເນປະລິມານສະສົມແຮ່ປະມານ 9.5 ລ້ານໂຕນ ຊຶ່ງຄາດວ່າຈະສາມາດຜະລິດແຮ່ເພີ່ມຂຶ້ນຈາກ 400.000 ໂຕນໃນປີ 2023 ຂຶ້ນເປັນ 1,2 ລ້ານໂຕນ ຕໍ່ປີຫຼັງຈາກນັ້ນ. ບໍ່ໃຕ້ດິນດີສໂຄເວີຣີດີບ ຈະຍືດອາຍຸການຂອງໂຄງການເຊໂປນ ອອກໄປຕື່ມອີກ 7 ປີ ຈົນເຖິງ 2030 ປະກອບສ່ວນໃສ່ການພັດທະນາແບບຍືນຍົງໃຫ້ແກ່ຊຸມຊົນທ້ອງຖິ່ນ.
ທ່ານ ພໍ ແຮຣິສ, ຜູ້ຈັດການໃຫຍ່ ບໍ່ຄຳ-ທອງເຊໂປນກ່າວວ່າ: “ຢູ່ເຂດເຊໂປນ ມີປະຫວັດສາດການຂຸດຄົ້ນບໍ່ແຮ່ມາຫຼາຍພັນປີ. ການພັດທະນາໃໝ່ນີ້ຈະນຳໃຊ້ອຸປະກອນທີ່ທັນສະໄໝ ແລະ ເຕັກນິກການຂຸດຄົ້ນບໍ່ແຮ່ທີ່ກ້າວໜ້າ ເພື່ອ ຖ່າຍທອດຄວາມຮູ້ ແລະ ທັກສະໃຫ້ແກ່ ພະນັກງານ ແລະ ຜູ້ຮັບເໝົາຄົນລາວ ກໍຄື ວິຊາການມືອາຊີບດ້ານບໍ່ແຮ່ທີ່ເປັນຄົນລາວ ເພື່ອວາງມາດຕະຖານໃໝ່ໆສຳລັບ ການຂຸດຄົ້ນບໍ່ແຮ່ໃຕ້ດິນ.”
ບໍ່ຄຳ-ທອງ ເຊໂປນ ທີ່ໄດ້ຮັບການຈັດອັນດັບ ປະເພດ A+ ຢ່າງຕໍ່ເນື່ອງ ໜຶ່ງດຽວໃນ ສປປ ລາວ ຊຶ່ງອອກໃຫ້ໂດຍກະຊວງພະລັງງານ ແລະ ບໍ່ແຮ່ ສຳລັບຄວາມມຸ່ງໝັ້ນໃນການປະກອບສ່ວນຕໍ່ການພັດທະນາເສດຖະກິດ ແລະ ສັງຄົມ, ສຸຂະພາບ ແລະ ຄວາມປອດໄພ, ປົກປັກຮັກສາສິ່ງແວດລ້ອມ ແລະ ຮັກສາມາດຕະຖານການດຳເນີນງານໃນລະດັບສາກົນ.
ບໍລິສັດ ລຊມລ ສືບຕໍ່ລົງທຶນໃນການຝຶກອົບຮົມ ແລະ ພັດທະນາ. ມາຮອດເດືອນ ມິຖຸນາ 2022, ບໍລິສັດ ລຊມລ ສະໜອງການຝຶກອົບຮົມກວ່າ 23,000 ຊົ່ວໂມງໃຫ້ແກ່ພະນັກງານຄົນລາວ ທັງການຝຶກອົບຮົມພາຍໃນ, ພາຍນອກ ແລະ ໃນໜ້າວຽກ ແລະ ການສຶກສາຢູ່ຕ່າງປະເທດ. ໃນເຄິ່ງປີຫຼັງ 2022, ບໍລິສັດ ລຊມລ ຈະຈັດຕັ້ງຫຼັກສູດ ໂຄງການນັກຮຽນຊ່າງເຕັກນິກ ຊຶ່ງມີເປົ້າໝາຍສຳລັບຄົນທ້ອງຖິ່ນ ແລະ ໂຄງການພັດທະນາຫົວໜ້າຄຸມງານ ແລະ ຜູ້ນຳ ເພື່ອຍົກລະດັບທັກສະໃຫ້ບຸກຄະລາກອນຄົນລາວ.
ຄວາມຫຼາກຫຼາຍ ແລະ ການມີສ່ວນຮ່ວມ ຂອງພະນັກງານ ລຊມລ ຍັງສືບຕໍ່ເຂັ້ມແຂງ ຊຶ່ງພະນັກງານຍິງກວມເອົາ 24 ສ່ວນຮ້ອຍ ແລະ 95 ສ່ວນຮ້ອຍຂອງພະນັກງານທັງໝົດ ແມ່ນຄົນລາວ (80 ສ່ວນຮ້ອຍ ຈາກທ້ອງຖິ່ນເມືອງວິລະບູລີ ແລະ ແຂວງສະຫວັນນະເຂດ).
ໂອກາດໃນການເຮັດວຽກທີ່ໂຄງການເຊໂປນ ແມ່ນເຊື່ອມໂຍງກັບບົດບາດດ້ານເຕັກນິກ ທີ່ກ່ຽວຂ້ອງກັບການສຳຫຼວດ ແລະ ພັດທະນາ ໂຄງການບໍ່ແຮ່ໃຕ້ດິນ ຊຶ່ງມີພະນັກງານຄົນລາວກວ່າ 300 ຄົນໃນປີ 2022.
ການແຜ່ລະບາດຂອງພະຍາດ COVID19 ໄດ້ກໍ່ໃຫ້ເກີດຄວາມທ້າທາຍສຳຄັນຕໍ່ສຸຂະພາບ ແລະ ຄວາມປອດໄພ, ການຂົນສົ່ງ ແລະ ການດຳເນີນງານ. ບໍລິສັດ ລຊມລ ເຮັດວຽກປະສານງານຢ່າງໃກ້ຊິດກັບເຈົ້າໜ້າທີ່ສາທາລະນະສຸກ ແລະ ລັດຖະບານ ຂັ້ນທ້ອງຖິ່ນ, ແຂວງ ແລະ ສູນກາງ ເພື່ອຮັບປະກັນການປົກປ້ອງພະນັກງານ ແລະ ຊຸມຊົນ. ພາຍໃຕ້ການຮ່ວມມືກັບພະແນກສາທາລະນະສຸກແຂວງສະຫວັນນະເຂດ, ພະນັກງານ ລຊມລ ແລະ ຜູ້ຮັບເໝົາ ໄດ້ຮັບການສັກວັກຊີນປ້ອງກັນ COVID-19 ຢ່າງຄົບຖ້ວນ ພ້ອມທັງເຂັມກະຕຸ້ນ. ບໍລິສັດ ລຊມລ ປະກອບສ່ວນປະມານ US$500,000 ໃຫ້ແກ່ລັດຖະບານລາວ ໃນການປ້ອງກັນ ແລະ ຮັບມືກັບ COVID19 ຊຶ່ງລວມມີ ການສະໜອງສະຖານທີ່ຈຳກັດບໍລິເວນ, ເຄື່ອງກວດແບບ PCR ແລະ ອຸປະກອນການແພດອື່ນໆ.
ແຜນງານກອງທຶນພັດທະນາທ້ອງຖິ່ນ ຂອງ ບໍ່ຄຳ-ທອງເຊໂປນ ແມ່ນສຸມໃສ່ການຮັບປະກັນສະບຽງອາຫານ, ການສຶກສາ ແລະ ສາທາລະນະສຸກ. ດ້ວຍເປົ້າໝາຍສະໜັບສະໜູນຊຸມຊົນທີ່ດ້ອຍໂອກາດ ໃນການປັບປຸງຊີວິດການເປັນຢູ່, ການເຂົ້າເຖິງນ້ຳສະອາດ, ສຸຂະອະນາໄມ, ຊົນລະປະທານ ແລະ ໂຄງລ່າງພື້ນຖານອື່ນໆ, ລຊມລ ຍົກລະດັບເມືອງວິລະບູລີ ອອກຈາກເມືອງທີ່ທຸກຍາກ ແລະ ບັນລຸເປົ້າໝາຍຕົວຊີ້ວັດໃນການຫຼຸດຜ່ອນຄວາມທຸກຍາກຂອງລັດຖະບານ. ບໍລິສັດໜັບສະໜູນການສ້າງຕັ້ງລະບົບ ການສະໜອງນ້ຳປະປາໃນເມືອງວິລະບູລີ, ໂຮງໝໍເມືອງ, ສຸກສາລາ, ໂຮງຮຽນ ແລະ ທຶນການສຶກສາ.
ທ່ານ ສະໝານ ອະເນກາ, ຜູ້ອຳນວຍການໃຫຍ່ ບໍລິສັດ ລຊມລ ກ່າວວ່າ: “ບໍລິສັດ ລຊມລ ສ້າງຊີວິດການເປັນ ທີ່ດີຂຶ້ນໃຫ້ແກ່ຄົນຮຸ່ນໃໝ່. ມາຮອດປະຈຸບັນນີ້, ບໍລິສັດ ລົງທຶນກວ່າ US$11 ລ້ານ ໃນເມືອງວິລະບູລີ ໂດຍຜ່ານກອງທຶນພັດທະນາທ້ອງຖິ່ນ ແລະ ສ້າງລາຍຮັບໃຫ້ແກ່ຊຸມຊົນ ກວ່າ US$49 ລ້ານ ໂດຍຜ່ານກຸ່ມທຸລະກິດທ້ອງຖິ່ນ. ລຊມລ ລົງທຶນໃສ່ຊັບພະຍາກອນຄົນລາວ ເພື່ອພັດທະນາຊີວິດການເປັນຢູ່ແບບຍືນຍົງ ແລະ ປັບປຸງໂອກາດສຳລັບອະນາຄົນ.”