ປະທານ ສະພາແຫ່ງຊາດ ປອ ໄຊສົມພອນ ພົມວິຫານ ຮ່ວມພິທີອັນເຊີນຮູບຫຼໍ່ເຄິ່ງຄີງ ປະທານ ໄກສອນ ພົມວິຫານ ຂຶ້ນປະດິດສະຖານທີ່ ອະນຸສອນສະຖານຂອງເມືອງ ວິລະບູລີ ແຂວງສະຫວັນນະເຂດ
ມິຖຸນາ 15, 2021
15 ມິຖຸນາ 2021, ປະທານ ສະພາແຫ່ງຊາດ ພະນະທ່ານ ປອ ໄຊສົມພອນ ພົມວິຫານ ໄດ້ເຂົ້າຮ່ວມພິທີອັນເຊີນຮູບຫຼໍ່ເຄິ່ງຄີງປະທານ ໄກສອນ ພົມວິຫານ ທັງເປັນວິລະບູລຸດຂອງຊາດ ກໍຄື ປວງຊົນລາວ ຂຶ້ນປະດິດສະຖານ ທີ່ອະນຸສອນສະຖານຂອງທ່ານປະທານ ທີ່ເມືອງ ວິລະບູລີ, ແຂວງສະຫວັນນະເຂດ.
ປອ ໄຊສົມພອນ ພົມວິຫານ ພ້ອມຂະນະລວມທັງ ເຈົ້າແຂວງໆສະຫວັນນະເຂດ ທ່ານ ສັນຕິພາບ ພົມວິຫານ, ຍັງໄດ້ລົງຢ້ຽມຢາມໂຄງການຄຳ–ທອງເຊໂປນ ຂອງ ບໍລິສັດ ລ້ານຊ້າງ ມິເນໂຣນສ໌ ລິມິເຕັດ (LXML) ເພື່ອຢ້ຽມຊົມການຜະລິດ ແລະ ຮັບຟັງການລາຍງານກ່ຽວກັບ ຜົນສຳເລັດດ້ານວຽກງານສິ່ງແວດລ້ອມ, ຄວາມປອດໄພ ແລະ ການພັດທະນາຊຸມຊົນຂອງບໍລິສັດ. LXML ເປັນວິສາຫະກິດແບບຢ່າງໃນ ສປປ ລາວ ແລະ ໄດ້ຮັບລາງວັນຍ້ອງຍໍລະດັບດີເລີດ (A+) ຢ່າງສະເໝີມາ ເຊິ່ງມອບໂດຍ ກະຊວງພະລັງງານ ແລະ ບໍ່ແຮ່ ໃນດ້ານການປະຕິບັດໄດ້ ຕາມມາດຕະຖານສາກົນດ້ານການຂຸດຄົ້ນບໍ່ແຮ່, ການປົກປັກຮັກສາສິ່ງແວດລ້ອມ, ການພັດທະນາຊຸມຊົນ ແລະ ມາດຕະຖານດ້ານຄວາມປອດໄພໃນການດຳເນີນໂຄງການ.
ອະນູສອນສະຖານ–ຮູບຫຼໍ່ເຄິ່ງຄີງປະທານ ໄກສອນ ພົມວິຫານ ແມ່ນໄດ້ຮັບການກໍ່ສ້າງຈາກກອງທຶນພັດທະນາຊຸມຊົນ ທີ່ສະໜັບສະໜູນໂດຍ ບໍລິສັດ LXML. ນອກຈາກນີ້ແລ້ວ ໃນຜ່ານມາ ບໍລິສັດຍັງໄດ້ກໍ່ສ້າງຫໍວັດທະນະທຳເມືອງວິລະບູລີ ເພື່ອຊຸກຍູ້ການທ່ອງທ່ຽວໃນພາກພື້ນ ນຳອີກດ້ວຍ.
ທ່ານ ສະໝານ ອະເນກາ, ອຳນວຍການໃຫຍ່ LXML ໄດ້ກ່າວວ່າ: “ບໍ່ວ່າຍາມໃດກໍຕາມ ບໍລິສັດ LXML ແມ່ນຍັງສືບຕໍ່ສະໜັບສະໜູນການພັດທະນາບຸກຄະລາກອນ ແລະ ຊຸມຊົນເຈົ້າພາບ. ບໍລິສັດມີຄວາມພາກພູມໃຈທີ່ໄດ້ປະກອບສ່ວນສ້າງຮູບຫຼໍ່ເຄິ່ງຄີງ ກໍຄື ອະນຸສາວະລີ ປະດິດສະຖານໄວ້ໃນໃຈກາງເມືອງວິລະບູລີ, ແຂວງສະຫວັນນະເຂດ ທີ່ເປັນແຂວງຖິ່ນກຳເນີດຂອງພະນະທ່ານ ໄກສອນ ພົມວິຫານ–ຜູ້ກໍ່ຕັ້ງພັກປະຊາຊົນປະຕິວັດລາວ ແລະ ສປປ ລາວ ເພື່ອເປັນກຽດອັນສູງສົ່ງໃຫ້ແກ່ພະນະທ່ານ.”
ພິທີທີ່ເປັນນິມິດໝາຍສຳຄັນຄັ້ງນີ້ ແມ່ນໄດ້ຈັດຂຶ້ນທີ່ອະນຸສອນສະຖານ ກໍຄື ຫ້ອງການເມືອງວິລະບູລີ. ພາຍໃຕ້ການນຳພາຂອງການນຳເມືອງວິລະບູລີ ໂດຍສົມທົບກັບບໍລິສັດ LXML, ການກໍ່ສ້າງເດີ່ນສວນອ້ອມອະນຸສອນສະຖານປະທານ ໄກສອນ ພົມວິຫານ ແມ່ນໄດ້ເລີ່ມຂຶ້ນໃນເດືອນ ກຸມພາ 2021.
ໃນຜ່ານມາ, ນັບແຕ່ປີ 2003, ກອງທຶນພັດທະນາຊຸມຊົນຂອງ LXML ໄດ້ລົງທຶນ US$10 ລ້ານ ສະໜັບສະໜູນເມືອງວິລະບູລີ ເພື່ອປັບປຸງຊີວິດການເປັນຢູ່ຂອງປະຊາຊົນ ໂດຍສອດຄ່ອງກັບ ແຜນພັດທະນາເສດຖະກິດ-ສັງຄົມແຫ່ງຊາດລາວ.
ໃນຖານະຄູ່ຮ່ວມພັດທະນາສຳຄັນໃນ ສປປ ລາວ, LXML ມີຄວາມມຸ່ງໝັ້ນເປັນບໍລິສັດຂຸດຄົ້ນບໍ່ແຮ່ດີເລີດ ແລະ ສ້າງຄວາມອຸດົມຮັ່ງມີໃຫ້ແກ່ສັງຄົມ.
ພະນະທ່ານ ປອ ໄຊສົມພອນ ພົມວິຫານ, ປະທານສະພາແຫ່ງຊາດ (ທີ 2 ຈາກຂວາ) ໄດ້ຢ້ຽມຊົມຄວາມຄືບໜ້າຂອງການຜະລິດຄຳ ຂອງໂຄງການຄຳ-ທອງເຊໂປນ ພ້ອມທັງຍົກແທ່ງຄຳຮ່ວມກັບ ທ່ານ ຝູ ເຊຍເຊິນ, ປະທານ ບໍລິສັດ LXML (ທີ 2 ຈາກຊ້າຍ) ໂດຍມີທ່ານ ສັນຕິພາບ ພົມວິຫານ, ເຈົ້າແຂວງສະຫວັນນະເຂດ (ດ້ານຂວາ) ແລະ ທ່ານ ພໍ ແຮຣີສ, ຜູ້ຈັດການໃຫຍ່ LXML (ດ້ານຊ້າຍ).
ທ່ານ ສັນຕິພາບ ພົມວິຫານ, ເຈົ້າແຂວງສະຫວັນນະເຂດ (ທີ 5 ຈາກຂວາ), ທ່ານ ຝູ ເຊຍເຊີນ, ປະທານ ບໍລິສັດ LXML (ທີ 4 ຈາກຂວາ), ທ່ານ ພໍ ແຮຣີສ ຜູ້ຈັດການໃຫຍ່ ບໍ່ຄຳ–ທອງເຊໂປນ (ທີ 6 ຈາກຂວາ) ເຂົ້າຮ່ວມພິທີອັນເຊີນຮູບຫຼໍ່ເຄິ່ງຄີງປະທານ ໄກສອນ ພົມວິຫານ ທີ່ເມືອງ ວິລະບູລີ, ແຂວງສະຫວັນນະເຂດ.